Bdejna sena skolastika ġdida, li bħal dejjem iġġib magħha avventuri u sfidi ġodda. Insiru nafu għalliema ġodda, kif ukoll forsi ħbieb ġodda, apparti kotba u pitazzi ġodda. Il-ġdid dejjem iġib miegħu xi ftit ansjeta’ u biża’. Għalhekk huwa importanti ħafna li nippruvaw inżommu kalmi u nibqgħu iffukati f’dak li għandna bżonn nagħmlu!
B’dan il-mod inkunu qed ngħaddu messaġġ ferm pożittiv lit-tfal tagħna! Nistgħu nibdew billi noqogħdu ftit attenti anki fil-mod li bih inkellmu lit-tfal. Il-kliem li nużaw magħhom jistgħu jew jagħmlulhom kuraġġ jew jaqtgħulhom qalbhom. Barra minn hekk inkunu wkoll qed nagħtuhom eżempju sabiħ ħafna ta’ kif għandhom iġibu ruħhom ma’ xulxin. Bis-saħħa ta’ hekk ir- relazzjonijiet ta’ bejniethom jissaħħu iktar.
Żgur li lil uliedna rriduhom tfal ferħanin u li jkunu kapaċi jemmnu fihom infushom biex jimxu ‘l quddiem. Hawn taħt hawn lista ta’ seba’ frażijiet li t-tfal jieħdu gost jisimgħu u li jagħmlu ġid kbir.
7 frażijiet li kull tifel u tifla jieħdu gost bihom.
- Inħobbok.
- Kemm jiena kburi jew kburija bik.
- Jiddispjaċini.
- Naħfirlek.
- Għidli, qed nisimgħak.
- Din inti responsabbli għaliha.
- Prosit kemm inti kapaċi.
Naħsbu ftit…
Ninsabu ċerti li min qed jaqra dan l-artiklu f’qalbu qed jgħid – “Dawn anki jien nieħu gost bihom jekk xi ħadd jgħidhom lili”. Mela aħseb u ara t-tfal, kemm jagħmlu kuraġġ!!!
Kelma ta kuraġġ…
Life is a journey. When we stop, things don’t go right. Pope Francis
‘Il-ħajja hija vjaġġ. Jekk nieqfu, xejn ma jibqa’ sew’. Papa Franġisku.
Tislijiet – Josette Attard/Elisa Vassallo
PSCD – 2015/2016
St Ignatius College, Patri Ġużè Delia, Siġġiewi Primary 