Category: Other

For the English version of this post please click on this link: DLAP 182 – Summer Reading Campaign 2020

Dan is-sajf, għas-sitt sena konsekuttiva, l-Aġenzija Nazzjonali tal-Litteriżmu qed torganizza l-kampanja Aqra fis-Sajf / Summer Reading Campaign bil-għan li t-tfal ma jitilfux il-kisbiet li jkunu akkwistaw matul is-sena skolastika.
Minħabba l-pandemija tal-COVID-19, l-Aġenzija qed tippromwovi l-qari b’sessjonijiet ta’ qari online għal etajiet differenti fuq il-paġni ta’ Facebook tal-Aġenzija. L-għan ta’ dawn is-sessjonijiet interattivi huma li jsaħħu l-immaġinazzjoni u l-kreattività tat-tfal kif ukoll jgħinuhom jitkellmu b’mod iktar mexxej u kunfidenti.
L-iskeda ta’ sessjonijiet ta’ qari online matul ix-xhur tas-sajf hija kif ġej:
 Sessjonijiet ta’ qari bil-Malti u l-Ingliż għal trabi u tfal bejn 0 u 3 snin fuq il-paġna ta’ Facebook Aqra Miegħi / Read with Me – https://www.facebook.com/readwithme.nla/
Mit-Tnejn sas-Sibt: 08:45a.m.; 09:00 a.m.; 09:45 a.m.; 11:00 a.m.
 Sessjonijiet ta’ qari bil-Malti u l-Ingliż għal tfal żgħar ta’ bejn 4 u 7 snin fuq il-paġna ta’ fb Seħer l-Istejjer / The Magic of Stories – https://www.facebook.com/themagicofstories.nla/
Mit-Tnejn sas-Sibt: 08:30 a.m.; 09:15 a.m.; 10:45 a.m.; 11:15 a.m.
 Sessjonijiet ta’ qari bil-Malti u l-Ingliż għal tfal bejn 7 u 11-il sena fuq il-paġna ta’ fb Gost il-Qari / The Pleasure of Reading – https://www.facebook.com/GostilQari
Mit-Tnejn sas-Sibt: 09:30 a.m.; 10:30 a.m.
 Sessjonijiet ta’ qari bil-Malti u l-Ingliż għal tfal bejn it-8 u l-10 snin fuq il-paġna ta’ fb Bil-Qari u l-Kitba Niskorja / Footballers Read and Write Programme – https://www.facebook.com/footballersreadandwriteprogramme
Mit-Tnejn sal-Ġimgħa: 09:00 a.m.; 11:00 a.m.
 Sessjonijiet ta’ eżerċizzji fiżiċi u ħiliet tal-futbol fuq il-paġna ta’ fb Bil-Qari u l-Kitba Niskorja / Footballers Read and Write Programme mtellgħin mill-Sports Resource Leaders – https://www.facebook.com/footballersreadandwriteprogramme
It-Tnejn, l-Erbgħa u l-Ġimgħa fl-10:00 a.m.
Linji gwida għall-ġenituri biex iħeġġu lil uliedhom jaqraw:
 Isħqu ma’ wliedkom kemm hu important li fis-sajf jaqraw.
 Tkellmu fuq il-qari bħala attività ta’ gost.
 Araw li jkollkom lista ta’ kotba tal-qari xierqa għat-tfal tagħkom.
 Waqt il-ġurnata għandu jkun hemm ħin li fih it-tfal ma jkunux jistgħu jilagħbu logħob diġitali u/jew jaraw it-televiżjoni u minflok inkoraraġġixxu attivitajiet edukattivi.
 L-għażla tal-kotba li jkunu se jaqraw it-tfal/l-istudenti għandha ssir minnhom stess.
 Fid-dar għandu jkun hemm librerija u materjal stampat bħal kotba u rivisti xierqa li t-tfal ikunu jistgħu jaqraw.
 Saqsu lil uliedkom u ddiskutu magħhom il-kotba li jkunu qraw.
 Ftiehmu ħin matul il-ġurnata għall-irrakkuntar tal-istejjer.
 Isimgħu lil uliedkom jaqrawlkom il-kotba jew jirrakkontawhomlkom.
 Aqraw u uru interess fl-awturi jew sensiela ta’ kotba għal qalb uliedkom.
 Intom u tivvjaġġaw, isimgħu ktieb jew stejjer jinqraw fuq tablet, smartphone, jew diska kompatta.
 Uru lil uliedkom kif għandhom jaqraw billi fost oħrajn taqrawlhom.
Il-kampanja Aqra fis-Sajf / Summer Reading Campaign tiġi organizzata mill-Aġenzija Nazzjonali tal-Litteriżmu f’kollaborazzjoni mal-entità Libreriji Maltin u l-Fondazzjoni għal Servizzi Edukattivi. Min jixtieq aktar informazzjoni fuq il-kampanja, jista’ jżur il-paġna tal-Facebook ta’ Aqra fis-Sajf jew iċempel 2598 3324.
Grazzi tal-attenzjoni.

Gaetano Bugeja
Id-Direttur,
Id-Direttorat għall-Programmi ta’ Tagħlim u Assessjar

For the English version of this post please click on this link: DLAP 184 – European Day of Languages 2020

Il-Kunsill tal-Ewropa jorganizza l-Jum Ewropew tal-Lingwi biex jiċċelebra d-diversità lingwistika. Il-motto ta’ din is-sena huwa “Bil-Lingwi Niskopru d-Dinja”. Minkejja li bħalissa ma nistgħux inżuru kull pajjiż li nixtiequ, xorta waħda nistgħu niskopru l-kultura tal-istess pajjiż billi nitgħallmu l-lingwa jew lingwi tiegħu. Din is-sena, bħala parti mill-attivitajiet tal-Jum Ewopew tal-Lingwi, l-Aġenzija Nazzjonali tal-Litteriżmu qiegħda tħeġġeġ lit-tfal u ż-żgħażagħ biex juru x’kapaċi jagħmlu b’ lingwi barranin.
Il-parteċipanti huma mistiedna jieħdu sehem fil-kompetizzjoni: X’inti kapaċi tagħmel b’lingwa barranija? billi joħolqu u jibagħtu filmat qasir li juri l-ħiliet tagħhom f’lingwa barranija lil lara.ann.vella@ilearn.edu.mt sa nhar il-Ġimgħa, 18 ta’ Settembru 2020. Il-filmat jista’ jintbagħat ukoll f’messaġġ privat lill-paġna ta’ fb uffiċjali għal dan l-avveniment: Il-Politika Lingwistika. Il-parteċipanti għandhom jinkludu l-isem, il-kunjom, l-età, l-iskola u n-numru tat-telefown. It-tul tal-filmat għandu jkun bejn 2 u 5 minuti.
Dawn li ġejjin huma xi eżempji x’tista’ tinkludi fil-filmat/i. Ninkoraġġixxu lill-parteċipanti jissorprenduna bl-ideat kreattivi tagħhom:
1. Sajjar xi ikla u spjega r-riċetta b’lingwa barranija;
2. Tkellem dwar pajjiż li tixtieq iżżur wara li jgħaddi dan iż-żmien diffiċli;
3. Irrekordja u spjega xi ħaġa li tħobb tagħmel id-dar b’lingwa barranija;
4. Ikteb u aqra test qasir, bħal poeżija, kanzunetta jew storja b’lingwa barranija;
5. Irreċta skeċċ b’lingwa barranija.
Iktar informazzjoni u ideat jistgħu jinkisbu mis-sit tal-Jum Ewropew tal-Lingwi: https://edl.ecml.at/
Għal din il-kompetizzjoni hemm 4 kategoriji skont l-età:
1 Minn 3 snin sa 7
2. Minn 8 snin sa 11-il sena
3. Minn 12 sa 15-il sena
4. Minn 16 sa 18-il sena
Se jintgħażlu tliet rebbieħa minn kull kategorija. L-iskejjel bl-ikbar ammont ta’ parteċipanti f’kull kategorija se
jirċievu premju wkoll.
Għal iktar tagħrif, jekk jogħġbok ċempel 25982130 jew ibgħat ittra elettronika lil lara.ann.vella@ilearn.edu.mt.
Grazzi tal-kooperazzjoni.

Gaetano Bugeja
Id-Direttur,
Id-Direttorat għall-Programmi ta’ Tagħlim u Assessjar

The Institute for Education is accepting applications from parents/guardians interested in following online Parental/Guardian Sessions commencing between October 2020 and June 2021. These sessions will be online synchronous (live) sessions held through the Institute’s portal.
The Institute acknowledges the crucial role parents and guardians are playing in the education of their children. The sessions being offered will equip them with the right educational tools to be collaborative partners in the education and well-being of their children.

For more information and links to application please click on the  link below.

IfE 53.2020 – Parental-Guardian Online Courses 2020-2021