Author: Siggiewi Primary

Ġita Lejn Sqallija

Wara x-xita tal-ġranet ta’ qabel, is-Sibt 6 t’ Ottubru sebaħ jum bnazzi – sema kaħli mżejjen b’xi erba’ sħabiet bojod qishom tajjar. Tista’ tgħid lanqas żiffa ma kienet tinħass. 
Il-ġita tagħna lejn Sqallija bdiet kmieni filgħodu. L-ewwel waqfa tagħna kienet f’Pozzallo minn fejn ħadna kolazzjoni tipika a la Taljana. Wara morna Marzamemi, raħal pittoresk, b’popolazzjoni ta’ madwar mitejn ruħ. Hemmhekk żorna ċ-ċentru storiku u rajna kif jiġi magħmul l-inbid. 
Minn hemm bqajna sejrin għall-ikla buffet, fejn kulħadd ħareġ b’żaqqu mimlija bl-għazla kbira t’ ikel, laħmijiet u ħelu li kien hemm. Għalaqna din il-ġita fantastika billi morna Catania fejn stajna ngawdu il-famuż suq ta’ Catania, il-ħwienet u postijiet kulturali oħra bħal ngħidu aħna l-ġnien Bellini, il-pjazza Vincenzo Bellini u l-pjazza tal-Università. 
S. Abela

Jum Dun Karm

It-tfal tal-klassi 6.3 ippreparaw assembly speċjali lejliet l-għeluq il-147 sena mit-twelid tal-Poeta Nazzjonali Dun Karm Psaila. Wara riċerka li għamlu l-istudenti tal-istess klassi individwalment, inħoloq rakkont f’forma ta’ intervista. Kienu diversi mistoqsijiet li ħarġu spunti dwar ħajjet Dun Karm Psaila, kif ukoll twassal messaġġ sabiex inkunu iżjed grati u nagħmlu użu aħjar mil-lingwa tagħna, il-Malti. Inqaret ukoll poeżija miktuba minn Dun Karm Psaila stess – ‘Nar tat-Tiben?’, kif ukoll bħala skola sħiħa, kif isir kull filgħodu tkanta l-Innu Nazzjonali ta’ Malta li wkoll ġie miktub mill-istess poeta. Din l-attività kienet ta’ interess għall-istudenti għax ġie muri kif dan il-poeta kien tifel bħalhom u għamel suċċess f’ħajtu bil-kitbiet letterarji tiegħu u l-kontribuzzjoni kbira li ta lil-lingwa Maltija.

C. Ciappara