Wieħed bidwi miet u ħalla 17-il żiemel lit-tlieta minn uliedu. Meta dawn fetħu t-testment sabu miktub hekk:
Ibni l-kbir jieħu nofs in-numru ta’ żwiemel.
Il-fustani jieħu terz.
Iż-żgħir jieħu wieħed minn disgħa taż-żwiemel.
Kien impossibbli li jaqsmu ż-żwiemel b’dan il-mod. Nofs 17-il żiemel jiġu tmint iżwiemel u nofs. U kif tista’ tiddividi 17-il żiemel f’disgħa? Qamet ġlieda bejn l-ulied sakemm iddeċidew li jitolbu l-għajnuna lil bidwi anzjan li kien magħruf għall-għerf tiegħu.
Il-bidwi x-xiħ qara sew dak li kien hemm fit-testment. Qagħad jaħseb ftit u mbagħad mar ir-razzett tiegħu u ġie lura biż-żiemel tiegħu. Hekk issa kien hemm 18-il żiemel u mhux 17. Beda jiddividi n-numru ta’ żwiemel skont kif kien hemm imniżżel fit-testment:
Nofs 18 jiġu 9. Għalhekk ta disgħa żwiemel lill-kbir.
Terz ta’ 18 jiġu 6. Għalhekk ta sitt żwiemel lill-fustani.
Wieħed minn disgħa ta’ 18 jiġu 2. Għalhekk ta żewġ żwiemel lit-tifel iż-żgħir.
Issa, 9 u 6 u 2, jekk tgħoddhom flimkien jiġu 17-il żiemel – eżatt kemm ħalla żwiemel il-missier.
Meta kull tifel kien ħa dak li kien imiss lilu, ix-xiħ għaref qabad iż-żiemel tiegħu li kien ġab u telaq lura r-razzett bih. Il-problema kienet solvuta.
F’ problema li tidher mingħajr soluzzjoni wieħed irid ifittex dik ix-xi ħaġa li hi barra mill-kaxxa taċ-ċirkustanzi u l-attitudnijiet li jkunu qed iwaħħluna fil-problema. Jekk infittxu ż-żiemel li ħadd ma kien qed jaħseb fih – dak tal-bidwi x-xiħ – inkunu sibna ċ-ċavetta biex inħollu l-kobba li nkunu tfixkilna fiha. Jekk nibqgħu imsakkrin fiċ-ċirkustanzi diffiċli, fina nfusna, fir-rabja li hemm fina, fil-weġgħat jew fid-drittijiet tagħna biss, nibqgħu imwaħħlin fil-konflitt, fid-dwejjaq u l-miżerja li nkunu fihom. Jekk trid issib lilek innifsek , oħroġ minnek innifsek!
Tislijiet,
L-Għalliema tal-PSCD.
St Ignatius College, Patri Ġużè Delia, Siġġiewi Primary 