George sema’ xi ħsejjes billejl u meta ħares mit-tieqa ntebaħ li kien hemm xi ħallelin qed jisirqu l-għodda tar-raba’ li kellu fil-kamra tal-ġnien. Mill-ewwel ċempel lill-pulizija, tahom l-indirizz u qalilhom b’dak li kien qed jiġri. Iżda l-pulizija wieġbu xott xott. ‘’Agħlaq id-dar sew. Bħalissa ma nista’ nibgħatlek lil ħadd għax il-pulizija kollha okkupati bi problemi ferm ikbar minn tiegħek.
George ħalla ftit minuti jgħaddu u reġa’ ċempel. Din id-darba qallu: ‘’Toqgħodx tinkwieta!! Sibtilhom tarfhom kollha. Sparajt għalihom it-tlieta u qtilthom.’’ Malajr waslu xi tliet karozzi tal-pulizija li qabdu lill-ħallelin fil-fatt iżda xorta riedu sodisfazzjon mingħand George għax kien daħak bihom. Fil-fatt riedu jarrestawh fuq informazzjoni ħażina li hu kien ta apposta.
L-uffiċjal qallu: ‘’Gdibtilna meta għidtilna li sparajt għalihom u qtilthom.’’ George wieġeb: ‘’Bħalma gdibtuli intom meta għidtuli li m’għandkomx nies. Kellkom għax ġejtu għaxra biex taraw x’ġara.’’ L-uffiċjal ħass li aħjar iwaqqaf kollox milli jipproċedi imma l-gazzetti saru jafu u perrċu l-istorja xorta waħda.
Kif tagħmel jagħmlulek. Qabel ma takkuża lil xi ħadd agħti ħarsa lejk innifsek u ara jekk int stess intix qed tagħmel dak li qed tikkundanna fl-oħrajn. Il-qawl jgħid li min jiskonġra jrid ikun pur, jiġifieri li min irid jara l-ħażin f’ħaddieħor irid jibda billi jara l-ħażin fih innifsu.
Ibda int billi tkun onest u sinċier ma’ kulħadd. Min jaf, forsi l-oħrajn jagħmlu l-kuraġġ u jkunu onesti huma wkoll!!
Tislijiet,
L-għalliema tal-PSCD
St Ignatius College, Patri Ġużè Delia, Siġġiewi Primary 