Aqra u rrifletti – IR-RIGAL TA’ FABRIZIO

“Hemm xi ħaġa oħra x’nagħmel?” staqsiet is-segretarja.

Id-direttur, tassew imħabbat, ta daqqa t’għajn lill-arloġġ u lid-djarju. “Għal-lum daqshekk… nistgħu mmorru. M’għandna xejn aktar!”

Is-segretarja tbissmet: “Hemm il-lista tar-rigali tal-Milied tat-tifel tiegħek. Tinsiex li tlett ijiem oħra jkun il-Milied!”

“Imn’Alla ħsibt inti f’dan,” qal id-direttur waqt li ħa nifs ‘il ġewwa. “Naħseb li l-imsejken ibni se jinkorla għalija. U forsi għandu raġun. Ftit li xejn għandi ħin x’inqatta’ għall-familja. X’ħin nasal id-dar fil-għaxija, it-tifel ikun diġa’ raqad. Kważi qatt ma nitkellmu jiena u hu. Tal-inqas fil-Milied irrid nagħtih rigal sabiħ. Imma m’għandix ħin. Ejja nagħmlu hekk: ixtrihuli int. Tħabbilx rasek kemm jiswa. Iftaħ l-ittra u ixtri dak kollu li jrid it-tifel.”

Is-Segretarja fetħet l-ittra u bit-tbissima ċaqalqet rasha: “Jien dejjem nobdi l-ordnijiet tiegħek, imma din id-darba ma nistax.”

“Għax le? Jaqaw hemm xi ħaġa li ma nistax nixtri għal tifel ta’ tmien snin? Xi xtaq? Għidli.”

Mingħajr ma tkellmet, is-segretarja newlet lid-direttur l-ittra ċkejkna tat-tifel biex jaqraha:

“Għażiż papa’,

bħala rigal tal-Milied irrid li għas-sena li ġejja inti tħalli kuljum, jew kważi kuljum, nofs siegħa ħin għalija. Xejn ma rrid iktar.

It-tifel tiegħek, Fabrizio.”

Tislijiet,

Doreen Aquilina

Marie-Claire Sammut

(Għalliema tal-PSCD)